في بلد اللحى
مجموعة قصصية جميلة للكاتب حسام عادل اللى بعتبره صديقي وأخى , واعتبرها بداية جيدة وموفقة جدا للكاتب كبداية لروائى شاب .
أولا أسلوب الكاتب جميل , فلا يصيبك الملل عندما تقرأ له , وده يعتبر من الأشياء المهمة فى القصة او الرواية, والقصص أيضا متنوعة وجميلة.
ثانيا عجبتنى قصص صديقتي الأمريكية وسر حارتنا , عبد المأمور.
وليا تعليق صغير من وجهة نظري المتواضعة
فى بلد اللحى عجبتنى جدا جملة فى القصة
فما زال هناك الكثير من المسلمين الحقيقين
فى كل أنحاء البلد والذين أطلقوا لحاهم سنة
عن النبى (صلى الله عليه وسلم) وليس
رياء وخداعاً
لأن الصراحة الواحد زهق ان لازم اى روائى او ممثل يجيب الملتحى ده أسوأ شخصية فى الدنيا ومفيش واحد فيهم كويس
فى قصة الباشا حسيت انها مش واقعية وشئ خيالى ان ضابط يدافع عن عاهرة من ضابط أخر فاسد يريد الاعتداء عليها, حتى ان الضابط الشريف اتقتل بسبب موقفه ... فالواقع انهم مش بيدافعوا عن شرف العفيفات مش العاهرات والضابط ثالث ضميره يؤلمه فارسل للنائب العام عشان يشهد بالحقيقة , فالضابط ده اكيد عارف انها بلد الباشا مثل اسم القصة وان النائب العام نفسه فاسد .
فى قصة كبش فداء القصة نفسها عجبتنى والنهاية عجبتنى لكن معجبنيش الجزء الخاص ان الرئيس ميعرفش الفاسدين الى تحته بيعملوا ايه وان الثورة لو عدت على الخير هينتقم منهم ..لأ الرئيس عارف كل حاجة والفساد بيمر بأوامره وهو اللى سايب الفساد ده بمزاجه, ولو حاجة معرفهاش هيضايق عشان هو بس مخدش نصيبه من الفساد ده.
انا عارف انها قصص لكن أكيد القصص تنقل جزء من واقع عايشنه عشان كدا بس كان ليا التعليق ده وطبعا ده مش معناه انها قصص سيئة...
ويارب حسام يتقبله مني بصدر رحب :) , وبالتوفيق لقصص وروايات تانية ان شاء الله
