24 Following
amrhosny54943

amrhosny54943

Currently reading

صور من حياة الصحابة - المجلد الأول
عبد الرحمن رأفت الباشا

كم عمر الغضب : هيكل وأزمة العقل العربي

كم عمر الغضب : هيكل وأزمة العقل العربي - فؤاد زكريا
الواحد مخلص الكتاب من يومين لكن مفيش حد ليه نفس يكتب حاجة من الي بيحصل فى فلسطين واللي يحرق الدم اكتر ان فيه كلاب مبسوطة وشمتانة حاجة تحرق الدم بجد
اللهم انصرهم وكن معهم فليس معهم أحد, محاطون بأعداء وعملاء ومحدش هيعمل حاجة غير نندب ونشجب الاعتداء :(

أحب الاول اتكلم عن الكاتب

أول كاتب محترم الاقيه بينتقد السادات لكن فى نفس الوقت بينتقد ناصر لأن كل ما حد ينتقد ناصر نلاقيه بيمجد فى السادات والعكس بردو ناس بتشتم فى السادات وسايبين ناصر ولأ كأنه عمل حاجة.
فالكاتب مختلف وكلامه منطقى وموضوعى جدا عشان كدا قييمت الكتاب خمس نجوم
يعنى بينتقد هيكل وأجزاء من كتاب خريف الغضب لكن مش معنى كدا أنه بيحب السادات أو بيقول انه مش غلطان
هوا بس عايز يقول ان هيكل كداب .

الكتاب بيتكلم عن هيكل وكتاباته وتضليله والكاتب بيرد على هيكل فى كتابه خريف الغضب والغريبة ان كل الى بيحب يرد على هيكل بيرد من كتابات هيكل نفسه , لأن هيكل زيه زى بقية الاعلام معتمد على ان الشعب آفته النسيان وبينسى اى حاجة الاعلامى قالها زمان المهم بيقول ايه دلوقتى .

تقرأ فى الكتاب :

ازاى ان هيكل انتقد السادات من طفولته لحد ما اصبح رئيس مصر وأنه كان عميل للقصر لكن هوه هوا هيكل الى قاد الحملة الانتخابية للسادات عشان هيكل عنده أمل السادات يبقا ترومان !!!

وهيكل الى قال على السادات ان فقره وهو صغير سبب الحياة المبذرة المرفهة الى السادات عاشها بعد الرئاسة فى الاستراحات والقصور , هوا هوا هيكل الى قال عن فقر السادات انه جعله قريب من الشعب الفقير وان استراحة القناطر ده معمولة مخصوص عشان تكون قريبة من الريف أصل مصر !!.

ازاى ان السادات معروف ميوله للأمريكان من البداية لكن كان محتاج أول ما ممسك الحكم أنه يغير فكر الناس مش معقول مرة واحدة يقول ان امريكا كويسة وان السوفييت وحشين والى ساعده على كدا هيكل نفسه فى مقالاته , هيكل الى اتغير كلامه من ان امريكا هى اصلا العدو ولا يمكن فصل سياسة اسرائيل عن امريكا , بعد السادات قال ان أمريكا ممكن نحيدها وتبقا بعيدة عن الصراع , وهو نفس هيكل الى شكر جامد فى الاتحاد السوفيتى واسلحته , قال بعد كدا ان خمس طائرات وقعوا عندنا فى مصر وبدأ يشكك فى سلاح السوفييت .

هيكل الى قال ان هدف امريكا طرد السوفييت والخبراء السوفييت ولما حصل طرد الخبراء السوفييت,, السوفييت مرة واحدة اصبحوا عدو للحضارة المصرية واصبح خروجهم علامة على الوطنية

هيكل الى قاعد يلوم السادات عشان ان حرب أكتوبر كانت محدودة , تقرا مقالاته قبل الحرب تلاقيها كلها بتقول ان لازم نعمل حرب محدودة وان صعب جدا اصلا نحاول نهاجم خط بارليف.

اتكلم عن اختيار ناصر للسادات وان ناصر قال لهيكل وهوا رايح المغرب , انه عين السادات نائب راح هيكل قال ليه؟؟؟ قام ناصر قاله اصل الكل خد دوره فى نائب الرئيس فده دور السادات !!!!
وبعدين ناصر اتلخم فى مبادرة روجرز والاستنزاف ومش عارف ايه فقوم نسي انه يشيل السادات من منصبه.
طبعا كلام فارغ وبعدين يعنى ايه اصله عليه الدور ما هيا عزبة طبعا!!
وازاى يعنى ناصر نسي يشيله من النائب , على اساس انه السادات قاعد فى بيتهم من ساعة ما بقا نائب بيدعى ان ناصر ميشفهوش ويشيله من منصبه

أن هيكل انتقد فى خريف الغضب مساوئ حكم السادات وهى بنسبة كبيرة صحيحية لكن انتقد النتيجة وساب السبب وهى طريقة الحكم الى انجبتها ثورة 23 يوليه وعبد الناصر وهى حكم الفرد الواحد .

هيكل نموذج للاعلامى الفاسد ومستمر حتى الان للاسف, مرة فقر السادات يبقا وحش ومرة يبقا جميل , مرة لازم حرب محدودة ومرة لأ السادات غلط , مرة السوفييت اصدقاء ومرة واحدة سلاحهم وحش وضد الحضارة المصرية , والاعلام مستمر فى كدبه والناس مستمرة فى تصديقه مهما يقول ينسا قال ايه قبل كدا وبيصدقوا كلام الاعلام كأنه قرآن .

الكتاب متضمن كلام كتير مهم وكويس جدا عن ازاى السادات اتعيين نائب , وأسباب دخوله الظباط الأحرار , وكلام عن الحالة الفكرية الى بتقول ان محدش يشتم مصر بره مصر , قال يعنى احنا عارفين ننتقد جوا مصر اصلا , والى بينتقد الرئيس كأنه بيشتم فى مصر, ومحدش ينتقد الرئيس اصله مات وحرمة الاموات والجو ده كأن الى مات ده جوز خالتك مش رئيس بلد , يعنى من الاخر متنقدش الرئيس حيا أو ميتاً, وتقرأ ردود الكاتب المحترمة على كل الاراء ده .

كتاب جيد جدا انصح به