مصر و العالم العربى
من أسوأ الكتب التى قرأتها فى حياتى
واخر كتاب هاقرأة لحسين مؤنس ولو مكانش مات كان هيبقي ليا كلام تانى
الكتاب عبارة عن مجموعة مقالات نشرت للكاتب بين عامى 1987 و 1994
بدأت اول مقالة وكان اسمها مبارك ورياح النصر !!!!!
كلها مدح لمبارك الله يحرقه, شتمت واتحرق دمي بس قلت عادى مقال واحد, والكلام ده كان سنة 87 قبل عك مبارك لما يزيد لكن بردو نفاق ومدح زيادة اووووي ميتقالش بردو ..
قلت اكمل, إذ بى أوفوجئ الاقى كذا مقال بيمدح فى الرمة مبارك لحد مقالات فى سنة 1994, ولما اتكلم عن حرب اكتوبر, وعن مركز مصر العالمي وعن الفلاح المصري لحد ما اتكلم عن القرأن والاسلام بردو بيشكر فى مبارك,
هانقل شوية بس من اللى اتقال فى المقالات..
1 - الرئيس مبارك قدوة ومثل باخلاقه العالية ومبادئة القوية وحضوره الدائم في كل ميدان , واني أعد نفسي سعيدا لأني اعيش في عصره , وأري بعيني رئيسا لمصر كما كنت اتمنى.
يا عم انتا بتتمنى احنا مال اهالينا, ادينا عشنا 30 سنة فى امنيتك لما جالنا فيروس س وجميع الامراض
2- وقد اطمأنت قلوبنا ونحن نستمع الى الرئيس يتحدث بكل صدق وصراحة والحرية الى اننا نعيش بأمان لان لنا عيونا ساهرة وعارفة بكل شئ.
طبعا عيون ساهرة قاعدة بتراقب فى اللى جابونا
3 - بني لمصر مركز ممتاز
فعلا عملنا مركز ثالث فى بطولة افريقيا
4 - لا يفكر في نفسه ابدا بل في مصر وصالح مصر..
ده ابو علاء ولا حد تانى
5 - مبارك مضايق ان فيه بلاد اسلامية تعانى من التراجع العلمي , وان بلاد اسلامية تقنع بالعيش فى حالة التبعية العلمية او المالية للدول المتقدمة, وان بلاد عندها بترول بيجبلها فلوس تجيب الى هيا عايزاه لأ لازم الدول ده تشتري الصناعة وتربي شبابها على العلم والعمل
ايوا بقا السبب ايه يا مبارك يا مؤمن فى تخلف الدول الوحشة ده.. مبارك قال ان السبب ان الامة الاسلامية بعدت عن جوهر القرآن الحق وتعاليم الاسلام
يا واد يا مؤمن
6 - مبارك وصل الى مستوي قادة العالم بموهبة عظيمة فيه ومفيش زعيم من زعماء العالم الا اثني علي مبارك, ومبارك حكيم من حكماء عصرنا
7 - مصر اليوم دولة عظيمة بفضل مبارك
قصده اكيد اللاعب عظيمة اللى كان اول محترف لمصر فى المانيا ورجع تانى
8 - احسن حاجة لما ناصر مات انه جاب السادات فالسادات عين مبارك نائب فالشعب اختاره
اختار مين يابا احنا لبسناه ملحقناش نقول حاجة
9 - نحن نري الرياسة العالمية التى تتمتع بها مصر اليوم بفضل مبارك
فعلا بقينا تابعين ودولة محدش عاملها حساب
10 - مصر اليوم من اقوي دول العالم عسكريا وفي نفس الوقت نحن نستعين بأمريكا لان امريكا بحاجة لمصر والى تنبه بقا ان امريكا محتاجة مصر جورج بوش فالحج مؤنس بيقولك انه من انجح رؤساء امريكا وانه صاحب مفاوضات العرب مع اسرائيل والتى ستؤدي الى قيام دولة فلسطين غصب عن اسرائيل..
بيقولك امريكا محتاجة لمصر وحتة تانية مصر مش هتوصل للمكانة ده الا بامريكا هوا يعنى أمريكا حلوة ولا لأ متحيرنيش معاك,
ومصر فعلا من اقوي الدول العسكرية احنا عارفين من نبيل فاروق ان الجيش المصري ثالث اقوي جيش فى مصر معروفة طبعا..وبوش مين الى حلو ..وامريكا باالمفاوضات هتسمح بدولة فلسطين غصب عن اسرائيل.. يا راجل !!!!
11 - وبعد كدا شكر فى وزراء الحكومة وقالك كلهم كويسين جدا بس المشكلة فى الموظفين اللى تحتهم..
نفس كلام جرائد الحكومة وجو خيري رمضان وخميس الحديدي
12 - والمفاجأة بقااا اتفرجوا قال ايه عن الداخلية
رجال الشرطة الذين يحرسون امن الوطن والمواطنين بدون الانحياز فكر معين كل تفكيرهم منصب علي سلامة الوطن ويكون ابناء الوطن مطمئنين على ارواحهم واعراضهم , ومصر اشتهرت طوال تاريخها بشهامة رجال البوليس ووطنيتهم..
ده ما عاش اصلا فى مصر ده اكيد كان في قبرص, شرطة مين يابا الى طول عمرها شهمة ده طول عمرها بتنفخنا, ده معداش على قسم الازبكية حتى.
13 - بيمجد فى مبارك عشان قرار تحرير الكويت وبيقول مبارك حارب في الكويت بقرار منفرد بدون تدخل من احد
مع اننا لو سألنا اى حد بيقرأ حتى الاهرام المسائي هيقول ده قرار امريكي..زي مساعدة مجاهدين افغانستان ايام احتلال السوفييت
14 - من ايام محمد على مبارك الوحيد الى فهم وعرف وقدر دور الفلاح المصري
ده مبارك اخره يعرف اهمية الدور الارضى..اما الفلاح ففعلا قدره وخلاه يزرع بمياة صرف صحى عشان منهدرش حاجة حتى المجاري نستخدمها..
طبعا مفيش نقاش كتاب سئ ومدح لمبارك فوق الحد,ده عدي مصطفى بكري, وحسين مؤنس بردو شكر فى مبارك فى كتاب باشوات وسوبر باشوات بس كان فى سنة 1984 بس واضح ان كمل فى الطريق ده,
ده فى نفس الكتاب كان بينتقد عثمان بن عفان , يعنى كل ام الشكر ده فى مبارك وفى الاخر مش عاجبك عثمان بن عفان , ده انتا قلت كلام على مبارك كأنك بتتكلم عن أنبياء..
طبعا مكملتش بقية المقالات لاحسن اتشل ولا حاجة
ده مبارك حب الكتاب ده اكتر من فيلم طباخ الرئيس
الله يحرقه
